【明報專訊】周一晚有唐狗女為咗避雨闖入西鐵列車，因為狗狗原本嘅主人決定棄養，唔少人都好擔心狗狗嘅命運。噚日終於迎來好消息，漁農自然護理署獸醫檢查後，認為狗狗健康狀况穩定，性情溫和，已將佢轉送到愛護動物協會。因為佢係「黃雨下嘅狗狗」，愛協幫佢改咗個名叫雨雨，等待好心人領養！

9歲性情溫和 等待領養

愛護動物協會同Emily講，雨雨約9歲幾，望到佢嘅近照，肥肥哋都幾惹人憐愛。不過，愛協話佢有心絲蟲病，正安排緊治療。心絲蟲係一種由蚊傳播嘅寄生蛔蟲，隨住狗狗體內成蟲數量增加，就會干擾心臟正常運作，形成充血性心臟衰竭並引致死亡。

愛協又話，雨雨面對新環境，比較緊張，加上患病，所以暫時唔畀探望者同佢互動。如有合適領養者，遲啲至會安排同雨雨交流互動。愛協亦要求領養者定時帶雨雨返去愛協中心接受治療，醫療費用將獲豁免，由愛協「灰姑娘基金」支付。