【明報專訊】《粵港澳大灣區發展規劃綱要》月前出台，提出區內人流、物流、資金流、信息流更為便捷嘅多項措施。為方便市民穿梭大灣區各城市，香港天文台、廣東省氣象局同埋澳門地球物理暨氣象局合作推出「大灣區天氣網站」，畀大家出門前睇天氣。
呢個天氣網站一應俱全咁提供氣溫、降雨、閃電、天氣警告等實時資訊，亦唔係只有香港、澳門同廣東9個市咁簡單，係再分每個市內不同地區，大大話話涵蓋60幾個地區；而且仲有7天天氣預報，方便大家計劃行程。
涵蓋60幾個地區
Emily試試睇吓廣州市天河區嘅天氣，7天天氣預報仲會提供埋每一日、某啲時間嘅天氣預告，究竟係好天定落雨，氣溫、風速、相對濕度都睇得到。
