【明報專訊】選舉事務處被揭發2016年立法會選舉後遺失葵青一本選民登記冊，政制事務委員會噚日討論事件，泛民同建制議員都質疑事件係咪涉及內鬼、臥底潛伏，否則唔會咁清楚制度漏洞；有議員強調要刑事調查。 經民聯梁美芬質疑，今次並非首次發生選民資料外泄，問到政府系統會唔會潛伏咗有政治目的嘅「犯罪集團臥底」，佢哋可能技術好高、了解制度運作，認為政府應該重新、徹底設計系統。工聯會麥美娟亦問係咪有臥底，「上次知點樣偷電腦令你哋查唔到，今次選舉名冊就知道，如果唔係被查就可以瞞天過海。局長要嚴查，點解你哋破綻被識穿晒？」 民主黨黃碧雲亦擔心政府有內鬼，強調要刑事調查，「有內鬼要周個人出嚟」；又講到政制局有意明年推預先投票一事，佢強調提早投票後要搵地方存放選票7日，「會唔會有內鬼、有人做手腳？唔見咗一箱(選票)都好傷」。 就議員質疑，政制及內地事務局長聶德權強調，希望盡量了解問題所在，會檢視成個運輸過程，制度上確保程序，防範事件再發生，亦要先了解係咪有人為失誤並對症下藥。
|
| |
| |
