【明報專訊】話說令Marvel迷期待已久、迪士尼第二個Marvel主題項目「蟻俠與黃蜂女：擊戰特攻！」，今個禮拜日終於開幕，噚日舉行揭幕儀式(相關新聞刊C2)。Emily率先試玩，細心搵會發現入面有好多獨特嘅香港元素，包括蟻俠同黃蜂女講廣東話、食蛋撻！

故事背景講到，鐵甲奇俠再次邀請神盾局設立「神盾局科技館」，但賓客參觀嘅時候，邪惡組織Hydra喺香港發動雙重攻擊，試圖偷走儲存高度機密資料嘅數據核心，所以賓客臨時響應同蟻俠與黃蜂女一齊對抗機械蟲軍團。

玩嘅時候，入到去每人都會有一把「電磁脈衝槍」，目標係要縮小後進入機械蟲嘅內部，攻擊佢嘅散熱通風口。戰車前方會顯示玩家分數及命中率。

陳茂波話好玩

迪士尼仲特登叫Emily提醒大家，除咗要努力打低機械蟲之外，都可以留意一下今次嘅設施有唔少細心位，例如蟻俠同黃蜂女偶爾會爆一兩句廣東話、食蛋撻，香港人肯定有親切感。而且入面有一個畀「螞蟻」睇嘅指示牌，寫住話「身高必須高於1.27cm才能參與遊戲」，同埋「不得攜帶方糖」，代入感強。就連噚日試玩嘅財政司長陳茂波都話：「試吓玩啊，好玩啊！」