【明報專訊】政府建議修訂《逃犯條例》鬧得沸沸揚揚，雖然諮詢喺3月4日完結，但商界仍不停提出憂慮，保安局長李家超呢兩星期繼續見商會聽意見。民主黨涂謹申噚日喺立法會內會質疑李家超會唔會將諮詢期完咗之後聽到嘅意見考慮在內，內會主席、民建聯李慧琼(Starry)就引述唔在場嘅政務司長張建宗話，「保安局長會繼續積極同詳細，向各個持份者包括商會解釋政府嘅建議」。 民主黨涂謹申就話張建宗可能「攞唔到(問題)重點」，話自己上周問題係諮詢期完咗，李家超繼續見商界當唔當係諮詢一部分，係咪3月4日前聽到嘅意見先計數。Starry話，已好清楚將阿涂嘅意見反映畀司長，之後再話，「我知道局長𠵱家繼續同商會及不同政黨持份者會面，亦必定會考慮大家意見」。 李家超諮詢期後見商界 當唔當諮詢？ 此言一出，引起阿涂不滿Starry代張建宗答問題，又諷刺一直係建制派重點培訓對象嘅Starry：「你將來做特首你可以決定」。
|
| |
| |
