【明報專訊】區議會選舉今年11月舉行，政府預計宣傳費用大約750萬元。立法會政制事務委員會噚日開會討論區選宣傳安排，「掌心雷」又成為政黨爭拗點。 公民黨郭家麒批評，建制派過去幾次選舉都有人用「掌心雷」、以旅遊巴接載選民，平日又有蛇齋餅糉、廉價旅行等，批評係操控選舉；佢又質疑全港嘅區選只得750萬元預算，「一人一蚊呀？大家都知政府做緊戲，是但一區派蛇齋餅糉都唔止啦」。 民建聯主席李慧琼(Starry)就反問，「掌心雷」係咪即係派宣傳品提市民投票，「搞唔清議員講乜嘢」，佢強調所有宣傳單張都係提醒市民投票，「唔通收到單張就投嗰個(候選人)？係就我同你都唔使做咁多」。Starry又話，蛇齋餅糉成日被講為建制派專利，其實公民黨都有搞聖誕晚會，有抽獎、表演，「係咪蛇齋餅糉？」 賄選角色「撞衫」 李慧琼耿耿於懷 廉署早前推出廉潔鄉郊選舉宣傳片時，片中有賄選嘅角色被指衣著同民建聯義工服飾相似，Starry噚日亦喺會上講，希望可以多宣傳廉潔選舉，但佢似乎對條片仍耿耿於懷，都補多句「宣傳片千萬唔好影射某啲政黨政團」。 工聯會陸頌雄關注𠵱家網上宣傳為主，問當局會唔會多用社交媒體及討論區宣傳。選舉事務處總選舉主任黃思文話，根據2016年選舉經驗，可以多做網上宣傳，例如當時有喺雅虎香港(Yahoo!)、OpenRice等網站賣廣告，近年手機應用程式流行，可以研究吓多做工夫。
|
| |
| |
