【明報專訊】「知識改變命運」呢個道理，老師可能會同學生講，但原來亦都有人會用呢句說話教老師喺「大灣區」置業。

教局「教師日」 先由教聯講入會福利

噚日元朗區小學校長會同教育局元朗學校發展組共同舉辦「小學聯校教師日」，話要等老師分享吓「專業教研成果及學習經歷」。有老師入場後，發現禮堂椅子上有教聯刊物、宣傳單張等。當中有「教聯俱樂部有限公司」傳單，大字寫明「大灣區樓市全攻略課程」，話可以帶老師去大灣區考察上堂，「了解大灣區樓市」，傳單標明活動係「學術討論」嚟，唔會有「選房建議或邀約」。

有份出席、唔願意具名嘅老師話，活動開始前，司儀安排教聯代表上台，宣傳入會教聯嘅福利同活動，講咗約15分鐘。呢位老師覺得做法唔妥，投訴話唔應該嘥時間畀個別團體宣傳同教師專業發展無關嘅項目。Emily問過教聯人士，對方未有回覆。有份舉辦活動嘅教育局話注意到教聯喺講座開始前向參加者派發同「發展日」無關嘅資料，已提醒元朗區小學校長會檢討安排，局方亦會向教聯跟進。

教局:會向教聯跟進

Emily再望望入會教聯嘅福利，網上傳單顯示，只要一入會就有咖啡劵，亦有會員推薦獎勵，頭獎係香港航空雙人來回機票，但冇寫去邊；二獎就同三獎係華為同小米手機。