【明報專訊】北京開緊兩會，立法會因而休會，而民建聯劉國勳就搵到節目，北上睇中超，佢今日會同朋友上廣州，捧廣州恒大對日本廣島三箭嘅亞冠盃比賽。剛過去嘅周末，佢亦去咗深圳睇中超開鑼，睇深圳佳兆業對河北華夏幸福嘅比賽，仲話內地球場往往有幾萬人入場，氣氛好好。

劉國勳話，因為立法會休會，咁啱有朋友睇開中超，喺網上買飛好方便，所以就一齊去趁熱鬧。佢話去年都有去過廣州捧恒大場，恒大球迷出名激情，估計今晚氣氛會好好。佢話中超水平當然唔及英超、西甲等，所以如果電視直播，未必會睇，但近近哋北上入場感受氣氛又唔同，入場亦可以睇到球星，如恒大就有國腳級嘅巴西球員保連奴。家住北區嘅劉國勳話，佢上深圳睇波，時間快過返立法會，搭高鐵上廣州都好方便。不過佢話間中會入場撐港超，唔係淨係睇中超嘅，而作為球迷，佢真係希望足總諗吓辦法，吸引更多球迷入場撐本地波先得。