【明報專訊】財政司長陳茂波噚日上晝喺立法會宣讀《2019/20年度財政預算案》歷時接近兩個鐘，未必個個議員都全程專心聆聽，有議員疑似瞌眼瞓，有人撳電話唞吓氣。新民主同盟范國威(Gary)去到後段，就喺電腦搜尋好多嘢，當中出現咗多張藝人張栢芝照片，呢一幕咁啱被Emily嘅攝影同事影到，亦見到佢搵財爺照片、牛嘅照片，但Gary冇撳入去睇相。

到底Gary搵緊乜呢？佢解釋，當時諗緊回應預算案嘅主題，所以喺Google搜尋咗「貓哭老鼠假慈悲」、「九牛一毛」等關鍵字，希望搵圖整道具。及後Gary喺記者會上回應預算案時，就以「基建揮金如土，民生九牛一毛」做主題，圖片就用棒形圖展示「基本工程儲備基金」嘅升幅。

Google 圖片彈出藝人照

范國威解畫

Gary為表清白，更立即展示畀Emily睇，當時佢輸入「貓哭老鼠假慈悲」搜尋圖片時，喺較後頁數就出現咗張栢芝嘅性感照片，佢亦強調一出現唔關事嘅相，已立即「碌」走咗。Emily嘗試喺Google搜尋「貓哭老鼠假慈悲」，喺一大堆貓相後，的確見到有關照片。

唔少議員喺預算案宣讀時都被睡魔急call，好似建制派嘅張宇人、黃定光、黃國健、石禮謙，泛民嘅梁耀忠及林卓廷等，佢哋都分別被攝記同事影到疑似瞓着、閉目養神或出現「無眼睇」嘅情况。