法國總領事拜年:拿破崙保佑你
【明報專訊】農曆新年將至,一班外國駐港領事,包括英國駐港副領事柏德謙(Martin Badham)、美國駐港澳總領事唐偉康(Kurt Tong)、加拿大駐港澳總領事南傑瑞(Jeff Nankivell),同法國駐港澳總領事官明遠(Alexandre Giorgini)分別拍賀年短片同大家拜年,當然少不免介紹吓佢哋家鄉。各領事拍片時都係講廣東話,雖然好重口音,但都不得不讚吓佢哋誠意可嘉。
各領事拍賀年片 齊講恭he髮菜
法國總領事官明遠喺短片中,連領呔都印上豬公仔,相當應節;佢話今年係第一年喺香港過年,所以要辦吓年貨。行行吓街,佢話見到張「揮春」想買番張,有個女士話上面印住嘅係關公,貼喺門上可以保佑闔家平安;官明遠就話,法國嘅拿破崙都係形象勇猛,希望大家今年會有關公同拿破崙保佑咁話。不過Emily一睇,嗰張「揮春」其實應該係門神,而且塊面好似冇關公咁紅。
加拿大總領事南傑瑞喺片中就整咗唔少食物請同事食,仲話香港真係好多加拿大嘅好嘢食;有同事食素咁點算?南傑瑞強調加拿大支持多元文化,有素豬肉咁話。美國總領事唐偉康就喺片中話,今年係「土豬年」,對上兩次已經要數到1899年同1959年,驚歎原來美國總領事館已經喺香港百幾年啦。英國副領事柏德謙就特意去「石板街」辦年貨,仲買咗豬仔利市封𠻹!