特洛伊木馬豬仔錢罌版 現花車巡遊

豬仔錢罌高3.2米、闊3米，內籠係一個8米嘅立體空間。鄧師傅話設計上最困難係控制比例，「原先希望內籠可以容納多啲『獅子』，但咁嘅話錢罌需要再大啲 ，運輸上會有困難，而且未必神似，所以最終唯有減少獅子數目」。（旅發局提供）

【明報專訊】豬仔錢罌大家可能見得多，可以裝到幾隻醒獅嘅豬仔錢罌你又有無見過？話說Emily早前拜會香港張強國術總會總教練鄧肇倫師傅，佢透露年初一嘅「國泰航空新春國際匯演之夜」，會有一個高3.2米、闊3米嘅巨型豬仔錢罌喺巡遊隊伍現身！

入面會走出至少6隻醒獅

每年年初一嘅重頭戲一定係尖沙嘴嘅新春國際匯演，皆因每年都有好華麗嘅花車隊伍巡遊。香港張強國術總會參加過9年，以往都創作過巨型兔仔、花牌等表演道具，唔單只搶眼，亦為傳統舞龍舞獅加添新意。今年鄧師傅再獻新猷，帶來豬仔錢罌。錢罌內籠係一個8米嘅立體空間，當晚會由「獅子」喺錢罌頂部投入金幣，錢罌兩旁嘅門就會打開，入面會走出至少6隻獅子！

鄧師傅又話，今年嘅道具係用香港傳統豬仔錢罌做設計靈感，由度橋到完工足足花咗兩個幾月，用成6萬幾蚊。他笑住咁話，舞獅跳梅花椿，甚至係跳火圈，都比整呢個豬仔錢罌容易。

更多港聞

迎春接福過肥年

【明報專訊】明報仝人鞠躬 詳情