議會陣線自評：左膠右膠成功交叉

由朱凱廸（左起）、陳志全、毛孟靜、區諾軒、梁耀忠和范國威6名民主派「單頭」議員組成嘅「議會陣線」噚日成立一周年，發起成立陣線嘅毛孟靜話呢一年大家無鬧過交，不過就對大家嘅守時程度有微言，笑言呢個表形蛋糕係提大家守時。（何宛兒攝）

【明報專訊】6名民主派「單頭」議員毛孟靜(Miss Mo)、朱凱廸、區諾軒、范國威、陳志全和梁耀忠去年成立「議會陣線」，噚日?一周年嘅日子搞咗個茶敘，分享呢一年嘅合作感受。牽頭人Miss Mo形容，成立陣線係佢臨退休前「最愉快嘅意外，朱凱廸係『左膠』，我可能係『右膠』，咁樣都可以成功地交叉」，而佢哋唔綑綁投票，但係大家出奇地合拍。

Miss Mo買咗個表形蛋糕慶祝，話陣線過去一年無偷懶，未來會繼續同時間競賽、再接再厲，仲笑言希望大家開會可以準時啲。坐喺旁邊嘅阿廸默默幫手切蛋糕，發言嗰陣提到議會陣線好多時喺財會都比較多提問，將來希望喺「東大嶼人工島」等議題上，提煉到有用嘅資料出嚟畀議會用。陳志全就話喺議會抗爭上，成立陣線點都好過大家單打獨鬥，梁耀忠同范國威都話未來面對23條、再修改《議事規則》等議題時，希望民主派可以更有隊形。區諾軒就送咗「黨鞭」杯墊畀Miss Mo，希望身兼民主派會議召集人嘅Miss Mo繼續鞭策大家。

去到茶敘結束仲有啲蛋糕淨低，慢必同Miss Mo都話減肥唔食，Miss Mo笑言成個議會入面身材「至fit」應該係議會陣線。