【明報專訊】最近重出江湖、挑戰爭取連任大律師公會主席林定國嘅資深大律師戴啟思，係打司法覆核專家，佢喺1月份嘅律師會刊物撰文，就講到點解公職人員要宣誓、同有關宣誓嘅歷史。
戴啟思話，如果你就快要就職宣誓，但又對人大就宣誓嘅釋法感到疑慮，就要採用約400年前著名國際律師John Selden嘅提議：宣誓要好似吞藥丸咁，要成粒吞，千祈唔好諗住咬爛佢，否則你就會覺得好苦。Emily聽落都戥之前被DQ嗰班議員苦。
戴啟思話，1997年前透過選舉產生嘅立法局(97年後稱立法會)議員，喺宣誓時可以選擇效忠英女王或本港市民，但《基本法》104條無載入效忠市民嘅選擇，否則唔會出現DQ議員爭議。
John Selden話咀嚼會苦
戴啟思話，宣誓時唔好諗太多要講嘅說話，又引述John Selden，「今天需要起誓的事情如此多，故起誓就好像吞藥丸一般，你必須將它整顆吞下去。要是你咀嚼它，你會嘗到它裏面的苦澀味。同樣地，要你嘗試思考你所起誓的內容，你便會無法將這顆藥丸吞下去」。
