【明報專訊】「深水埗明哥」陳灼明近日真係好紅，繼盛傳有意參加立法會九龍西選舉嘅民建聯鄭泳舜，早前同藝人「Chef Le Mon」謝霆鋒去佢舖頭幫手整飯盒，參加泛民九西初選嘅民協馮檢基，噚日就喺facebook上載訪問明哥嘅片段，但like數唔見好多。Emily見明哥左右兩邊都撐，八卦問佢九西選舉有咩心水人選？原來佢話自己其實係中立，邊個去佢舖頭佢都招呼，但要佢站台助選，就一定唔會。

明哥話保持中立不站台

睇番馮檢基上載訪問片段，明哥話自己1983年起喺嗰區工作，當時已經識馮檢基，多年來一齊喺深水埗做幫助基層嘅工作。

Emily見明哥好似喺呢場「九西選戰」中再次亮相，問佢有無想邊個跑出，佢就話「無所謂」，「邊個當選都得，最緊要做實事，唔做嘢就唔支持佢」，佢強調自己唔會參與政治活動，邊個去佢舖頭都會招呼，就好似之前另一參加泛民九西選舉初選嘅姚松炎都落過去佢舖頭。明哥話，如果要佢站台就一定唔會喇，話要保持中立，希望可以同各界合作做關心基層嘅工作。

Emily聽聞同樣參加泛民九西初選嘅民主黨袁海文，搵咗贏過亞姐冠軍嘅藝人羅霖拍片支持，拭目以待。