【明報專訊】勞工及褔利局長羅致光(CK)喺網誌上，不點名批評一啲身兼社工嘅立法會議員嘅言論，質疑呢啲議員評論安老服務計劃方案時，唔熟書無睇文件。CK仲寫咗一個後記，話寫完網誌後，就醒起自己又係教授上身，「總是叫人看書，更忘記了自己講書無數，唔熟書時才應自我反省」。 CK喺網誌提到，「安老服務計劃方案」喺7月嘅立法會福利事務委員會向議員交代過，當中提及20個建議。CK話，有一位社工立法會議員喺施政報告致謝辯論中，對於資助長者聘請外傭嘅建議，話係「這點我們完全沒有討論過。我認為這簡直是石破天驚」。但CK話，呢個建議係由市民喺諮詢過程中提出，經研究顧問歸納接納再放進方案文本。佢仲話，如果議員關心呢啲議題，點會錯過份方案嘅重要內容呢？點解會唔知呢？ 邵家臻﹕不希望被羅轉移視線 當日講「石破天驚」嘅係工黨議員張超雄，佢噚日回應話，講「石破天驚」，意思唔係佢無聽過呢個計劃，而係政府事前無交代過資助計劃嘅規模、無講過引入幾十萬外傭。社福界立法會議員邵家臻就話，唔希望有關議題被羅致光轉移視線，指口舌之爭無補於事，強調議員係希望反映社會意見。
|
| |
| |
