【明報專訊】由國際樹木學會香港分部主辦嘅年度攀樹錦標賽，上月喺城門郊野公園舉行，吸引44名兩岸四地好手角逐，比賽項目包括空中拯救、投擲繩索同速度攀爬等，考驗選手樹上工作能力，最終女子組由文員轉職攀樹師、現年34歲嘅張凱祺奪冠，男子組就由54歲嘅攀樹師林楚豹勝出，兩人下年8月會代表香港，到美國俄亥俄州出戰國際賽。

攀樹似小鳥天上飛

政府新聞網噚日刊登兩人訪問，原來佢哋都係將興趣化為職業。連續3年奪魁嘅張凱祺話，佢有朋友從事樹藝工作，充滿熱誠，經常分享工作樂趣，例如見到嘅小動物同樹木等，自己亦受到影響，決定轉行。林楚豹自細鍾意爬樹 ，獲註冊攀樹師牌照後，每日喺樹上工作往往長達6個鐘，佢話享受爬得高、睇得遠嘅感覺，形容攀樹時好似小鳥飛到天上，回望大地四周都係花草樹木，拼湊出漂亮圖畫。