【明報專訊】平等機會委員會辦事處上月6日終於正式由太古城搬咗去黃竹坑香葉道41號16樓，仲喺網頁出咗告示提醒市民點樣去新辦事處。Emily聽講新址有兩層，建築面積約2.2萬平方呎，同之前相若。平機會發言人話，因為太古城辦公室面對不斷嘅加租壓力，一直搵緊新址，最後搵到黃竹坑呢個地方，租金比較平，但就唔透露平咗幾多喇。
睇番資料，由黃竹坑港鐵站行去平機會新寫字樓，只係5分鐘步行路程，與過往該會喺太古城中心租用嘅甲級寫字樓，由港鐵站行去嘅路程差唔多。不過，租金睇嚟應大不同，資料顯示平機會之前喺太古城租用嘅甲級寫字樓，呎租近50元。Emily睇過地產網站，黃竹坑新寫字樓大廈嘅辦公室呎租水平大約由25元起跳，應該慳番一筆。
平機會曾於向立法會提交嘅文件表示，長遠希望政府可以認真考慮為平機會設置永久辦事處，以免卻市場租金浮動嘅風險。
