【明報專訊】立法會完成今次會期後即將會放聖誕假，明年1月10號先再復會，不過近排立法會「打緊仗」，泛民建制關係緊張，建制派要坐定定開會，向來豪氣嘅經民聯議員張華峰(肥老闆)噚日就預備咗一間米芝蓮一星中環意大利餐廳嘅薄餅、日本靜岡蜜瓜配黑毛豬火腿同熊本士多啤梨，請議員、記者同秘書處同事食。肥老闆話只係花咗少少錢請大家食嘢開心吓，Emily聽聞，肥老闆都花成5位數字預備食物。

肥老闆話，見就快聖誕節同新年，大家近排開會都辛苦，所以請大家食嘢開心吓，平日識飲識食嘅肥老闆對食物非常講究，生果係即日由日本空運到港，Emily聽聞，肥老闆拎原隻黑毛豬火腿畀餐廳切片時，對方建議可以配餅乾食，但肥老闆覺得餅乾太乾唔好食，於是命人去買蜜瓜。

咁豪氣，Emily問肥老闆係咪喺股市有斬獲？佢就笑笑口話最緊要大家開心，不論贏輸，都會請大家食嘢。