【明報專訊】今年除夕，維港兩岸又再上演煙火匯演，而今年煙火跨度由以往嘅800米，增加至1100米，發放煙火嘅躉船亦加到5艘，規模為歷年最大。中環海濱同尖沙嘴文化中心露天廣場一帶都係理想觀看地點，預計有33萬人次觀賞。

旅發局話，今年將首次引入西班牙獲獎製造商嘅煙花，歷時10分鐘嘅煙火匯演，去到第6分鐘有一幕「魔法星塵」，煙火停留喺半空嘅時間會更長；心形圖案效果嘅「心花怒放」亦將首次呈現。

中信大廈、海港中心、夏慤大廈、金鐘道政府合署，同埋稅務大樓共5幢大廈，當晚11點起每隔15分鐘發放「許願流星煙火」。當晚10點，澳洲演藝團體Strange Fruit會喺尖沙嘴天星碼頭外面表演戲劇、舞蹈同馬戲雜技。想喺除夕夜感受歡樂氣氛，就唔好錯過嗰晚嘅倒數活動喇。