【明報專訊】住喺深水埗同大埔嘅居民，終於可以告別跨區睇戲嘅日子。UA院線宣布，明年將會陸續喺青衣、深水埗同埋大埔開3間新戲院，UA話佢哋係優先考慮喺未有戲院嘅地區開新戲院，希望達到每區有戲院，照顧唔同地區居民需要。 打響頭炮嘅會係明年1月開幕嘅UA青衣城(UA Maritime)，設有6個影廳，提供600多個座位，仲配備D-BOX動感電影系統、杜比全景聲Dolby Atmos音響設備及雷射投影技術。 至於預計明年上半年開幕嘅UA深水埗，會有3個影廳，提供逾300個座位；去到明年第四季或2019年上半年，UA院線仲會進駐十幾年來被人叫做「戲院沙漠」嘅大埔，喺大埔超級城開戲院，將會有4間影院逾300個座位。
|
| |
| |
