【明報專訊】特首林鄭月娥繼上月8日舉行首次集思會之後，噚日就喺闊別7個月嘅政務司長公館主持第二次集思會，除咗司局長外，仲加入咗10名副局長，與會嘅高官都好有隊形，著晒白Tee。

政府發言人話，集思會一早已經安排噚日舉行，由朝早10點到下午4點，其間有討論施政報告、管治風格等等。消息人士同Emily講，今次會上評估開局頭50日嘅情况，仲評估政府開局大致順利。

林鄭facebook昨晚約11點貼文講今次嘅集思會，仲有相睇，佢同政務司長張建宗、律政司長袁國強等司局長一齊著住白色Tee喺青葱草地、豎起手指公合照；另一張相就係佢哋食晏嘅情况，見到有燒肉、齋鹵味、豬仔包咁！

網民fb留言「你有你遊行……」

有網民睇到呢個post都立即畀反應，截至發帖後約逾40分鐘，一共有295個讚好、94個嬲嬲、18個心心、兩個笑哈哈同一個喊樣。

有網民話支持林鄭，但都有人唔係太滿意，適逢噚日有遊行，有網民就留言話「你有你遊行……」，另有網民話「請你務必要要盡快回應今天(昨天)遊行事件，唔好同CY一樣唔理」。