【明報專訊】自從馮煒光當年加入政府做新聞統籌專員後，新民黨陳家珮(Judy)一直「承繼」南區海怡西嘅區議員席位，噚日Judy辦事處開幕，地點竟然係隔籬區嘅海怡東商場，莫非Judy撈過界，甚至新民黨想派人部署參選海怡東？

話高調反對開特賣場 得罪業主

Judy同Emily講，絕對無打算搵人參選海怡東，辦事處去咗隔籬區，只係因為早兩年海怡西商場要開特賣場，佢哋高調反對，得罪咗業主，搞到業主唔同佢續約，後來已經將辦事處開喺海怡東街市內，但由於舖位太細，於是近日就搬咗去商場地舖，新辦事處地方大啲可以間房，亦近港鐵站，方便居民。

Judy噚日喺辦事處開幕致辭時話，希望大家繼續支持佢，為社區、為香港貢獻更多，其實政圈都傳聞，Judy係新民黨主席葉劉淑儀嘅熱門接班人，Judy就話新民黨喺港島區都有4、5個辦事處，每兩星期都會同其他黨友交流不同議題，自己一向關心全港、特別係港島區嘅事宜。