【明報專訊】香港青年協會與保誠保險有限公司合辦「成功在望」獎勵計劃，噚日邀請咗100個青年一齊分享夢想，表現卓越嘅同學仔有機會獲最多合共4萬港元嘅「成功在望獎勵金」。活動邀請咗19連勝拳王、「神奇小子」曹星如(Rex)分享自己追夢經歷。 Rex形容自小渾渾噩噩，「以前嘅我係無夢想！就好似一嚿飯！」會考後，Rex曾為應付家人報讀電腦課程，又試過做各樣兼職度日，輾轉下幸得師父邀請，入拳館做助教。佢自言初時因為年紀輕，常遭白眼，「以前有外籍學徒用英文問我問題，我唔識講英文，最後佢用英文粗口鬧我」，經歷數次類似事件後，Rex立志要做好自己，努力訓練，打出好成績。 Rex其後3次奪得香港業餘拳擊比賽冠軍，職業生涯累積19連勝，成為香港不敗拳王。佢話𠵱家目標係世界冠軍，寄語年輕人只要堅持下去，總會達成夢想。 「成功在望」獎勵計劃，100名入圍學生青年噚日向50個來自各行各業嘅特別嘉賓「推銷夢想」。賴同學話自己嘅夢想係成為作家，自言受家人薰陶，準備喺暑期參加寫作工作坊等裝備自己，佢更將作品輯錄成小書，向嘉賓推銷夢想。呢項活動會向20名表現卓越參加者各頒發1萬元實踐目標，向夢想邁進，並於明年匯報經歷同得着，當中最多6人可各競逐額外3萬元嘅「生涯規劃大獎」。
|
| |
| |
;){kind=small}
