【明報專訊】一向唔吝嗇評論時事嘅大律師公會前主席石永泰，接受商台節目《雲常開》訪問，形容自己係「和理非非、大中華膠」。何解呢？原來石永泰噚日提到港獨思潮，認為當下只能喺港獨以外尋找出路，例如移民，或者等現今話事者「自然流失」，又話希望港獨支持者除咗派傳單同出聲明反駁外，可以「用25字以下話我聽打算如何實踐」。 年逾半百嘅石永泰，對時下年輕人亦有一套看法，形容好多年輕人接受唔到批評，經常以「制度逼出嚟」去解釋行為，但佢唔認為可以用呢個理由「去做一啲客觀嚟睇唔啱嘅事」，舉例話衝擊港大校委會事件達唔到目的，反而令人有話柄。 去年初卸任主席嘅石永泰，被問到點睇香港前途時，佢話近一年半載「好鬱悶」，因為有太多歪理和妖孽，佢以電影《十年》獲獎為例，形容有人批評《十年》小成本唔應該攞獎、藝術畀政治騎劫等等，係為咗「交心」而講「妖孽嘢」。石永泰亦不忘向政府發炮，對於特首梁振英嘅「行李門」，佢認為梁振英應該道歉，笑言「點解黎明可以做特首呢？就係黎明第一時間出來(道歉)！」
|
| |
| |
