【明報專訊】Emily收到消息，有「交通神探」之稱、幫過唔少市民伸冤嘅理工大學機械工程學系工程師盧覺強，會喺今個月底退休。盧覺強話，教咗書40年，點都有啲唔捨得，但自己應「退休都係退而不休」，會繼續擔任法庭嘅專家證人，為市民服務。佢話有唔少市民聯絡佢，答謝佢多年嚟幫咁多人平反案件。

由1994開始擔任法庭專家證人嘅佢，自言有九成幾案件都係勝訴。最難忘係有一單喺西貢發生嘅小巴同私家車交通意外，當時小巴有5個證人，私家車只得佢同司機做證人，佢花咗好多時間做模型示範，同各種物理學嘅理論，最終說服到法官相信係小巴越線在先。

公布退休消息後，佢嚟緊仲會出席幾個學生飯局，有啲仲係上世紀七八十年代讀飛機工程嘅學生。佢話最希望自己嘅經歷啟發到學生學以致用，「讀書唔係只係求分數，要諗吓點幫啲社群」。盧覺強話無正式收過徒弟，但期望有學生會繼承佢嘅任務。

Emily問佢退休後仲有咩打算？佢話有朋友叫佢參選區議員，但佢話志不在此，始終想用專業知識喺法庭上繼續幫手。勞碌半生，佢話間中會去吓旅行，搵朋友踢波，得閒仲可以湊孫。