【明報專訊】前政府規劃師薛國強向城規會提出取消金鐘至中環電車路軌後，香港電車迷會除咗網上聯署，噚日仲發起為期一星期嘅「全城一人一相#撐電車行動」，畀市民去活動facebook行動專頁上載電車相以表支持。「叮叮」見證香港111年歷史，唔少人響應行動，分享對電車嘅感受。會長李俊龍話電車係香港獨有文化，希望藉行動提升市民對電車嘅保育意識，收集到嘅意見同相片會轉交城規會。

顧問報告批評電車軌佔德輔道中三成路面面積，李俊龍就認為報告嘅理據太片面，「事實上係中環太多私家車，又多貨車上落」。對於薛國強指「港人愛懷舊，倒不如將電車放去博物館」嘅言論，佢就認為電車有與時並進，現時佔行駛電車車輛三分之一嘅第七代電車，新增實時定位服務，方便乘客。佢話不合時宜嘅第一代電車就適合成為館藏，又強調「就算點變都係香港嘅電車」。