【明報專訊】政府早前一口氣換走兩個問責局長，足球發燒友、工業界立法會議員林大輝噚日以球賽為例，話領隊有權派合適球員上陣，但𠵱家啲領隊用人唯親，只安插心儀球員，令到多個位置出現錯配，而球隊輸波時，領隊更諉過於部分表現不過不失嘅球員，「匆匆將他們開除」，但就繼續容許表現差劣嘅「愛將」喺球場上「行行企企」，將令士氣更低落、球迷更憤怒。

大輝喺《am730》專欄又話，如果領隊只係懂得紙上談兵，花言巧語，但就交唔出成績，最終一定會畀人唾罵，仲直接話「班主」為免球隊繼續沉淪，恐怕亦會考慮忍痛換人。

市民唔多認到曾德成

任職民政事務局長8年嘅曾德成，上個月21日突然以「樂意現在退休」為由「被退休」，曾德成唔做官「返回」民間，無咗專車同司機接送嘅待遇，Emily噚日就「野生捕獲」佢 「走入群眾」，齊齊等巴士，但似乎唔係太多人認到佢。

曾德成噚日穿白色恤衫、黑色西褲，約中午11點半喺中環恒生銀行門口出現，曾德成睇嚟可能唔係好熟巴士路線，多次去睇巴士站頭指示牌，最終選擇咗去北角嘅10號巴士，車費3.4元。不過前局長已屆66歲，如果有申請長者八達通，應該可以享受到兩蚊搭車優惠。