湊數開會 議員瞬間轉移 4委會齊開 政改會險流會

湊數開會議員瞬間轉移
4委會齊開政改會險流會

[2015.05.27] 發表

【明報專訊】「我喺骨灰龕！」噚日立法會2017年特首產生辦法方案小組委員會開會前，幾個議員一齊大嗌呢句說話，點解呢？原來委員會點名搵議員，有議員正出席喺另一會議室嘅骨灰會議，到政改會夠鐘時，只得主席譚耀宗、民建聯葛珮帆同銀行界吳亮星3個議員在席。由於呢個委員會要有20個委員在席先可開會，秘書處一度要向其他委員會「打主意」，先請其他委員會成員趕嚟會議室「開住先」，其中一個對象單位，就係《私營骨灰安置所條例草案》委員會嘞！

政改會骨灰會輪流周圍借議員

其實噚日大樓係「四會齊開」，所以議員先會「分身不暇」，「四會」包括政改會、骨灰會、發展事務委員會，同保險會。好似民建聯葉國謙咁，佢本身係「骨灰會」嘅主席，要主持會議，但都被先請移玉步去政改會，希望政改會可以集齊法定人數。但後來一班議員又發覺，加埋骨灰會嘅議員，政改會都係唔夠人，咁一班議員又「轉場」，打算先開番骨灰會先。

不過數數吓，議員發覺「骨灰會」原來都係唔夠人，最終連骨灰會都要去借人，走咗去發展事務委員會「借議員」開會。結果唔少「會籍重疊」嘅議員，都畀人好似「趕羊仔」咁，喺唔同嘅會議室趕來趕去。

政改會遲9分鐘開始

最後都算好彩，政改會仍湊夠人開會，但就遲咗9分鐘先開到。委員會主席譚耀宗喺開會前特別向官員解釋，話今日議員好忙，所以要遲咗少少開始。