【Emily】「無處不美食」 葉劉港島一日五餐 倡特色小店用創意吸客
【明報專訊】新民黨主席葉劉淑儀上周末與黨友化身「Foodie」,走訪港島多間餐廳。佢話其實香港好多特色小食店、咖啡店、雪糕店等生意都唔錯,而香港除咗「無處不旅遊」,更加係「無處不美食」,相信只要發揮創意、緊貼潮流,特色小店不愁無客源。不過,葉太噚日喺社交媒體話,今次係帶病去食嘢,話上周五開始喉嚨痛同咳嗽,前日起身更失聲,加上周六跑咗一日周圍搵食,可能疲勞過度「打敗仗」。
葉太話已經睇咗醫生,所幸並非患上流感或新冠病毒,可能只係過勞,佢之後喺醫院歎腸仔雞蛋早餐,然後即刻食藥。
帶病「搵食」 過勞病咗
葉太喺facebook分享,前日與立法會議員陳家珮、區議員何沅蔚同黃雨程等,結伴到港島區多間食肆品嘗美食,一日食足5餐。睇番佢嘅美食地圖,首站先到灣仔「元朗合隆」總店食魚蛋粉,然後到翻新過嘅皇后街熟食市場歎下午茶,並喺中環「九記」排隊半個鐘食馳名牛腩。意猶未盡嘅葉太之後幫襯一間台灣雪糕店,最後去咗一間韓國餐廳食人參雞湯,結束「吃貨周末」。
葉太提到,喺歌賦街見到大量外國旅客,其中「九記」門外人龍幾乎都係韓國旅客,佢話據聞韓國駐港總領事曾經介紹歌賦街嘅美食,所以吸引遊客慕名而來。