【Emily】旅遊博覽下周開鑼 大阪世博力推攻略
【明報專訊】4月開幕嘅「大阪.關西萬博」係今年世界矚目旅遊盛事,下個禮拜喺灣仔會展舉行嘅香港旅遊博覽會2025,「大阪.關西萬博」都會參展,到時會有專人詳細介紹參加大阪世博嘅各種門票、交通、住宿、周邊觀光等須知事項,同埋會場必睇重點同推薦體驗嘅內容。本地旅遊盛事就有「港產大熊貓」掀起嘅熱潮,海洋公園亦會參展,會喺場內設置大熊貓打卡位,仲會出售多款大熊貓主題商品。
海洋公園擺大熊貓打卡位
香港旅遊博覽會下星期四起一連4日(20至23日)舉行,今年係第二屆。舊年首屆博覽會連同「香港秋季博覽會」合共有超過140萬人次入場,今年嘅博覽會有超過300個展位,仲會安排40場旅遊相關講座同表演,每日頭500個入場嘅人可獲免費旅遊SIM卡嘅機會,亦有總值53萬元、超過4700份獎品嘅抽獎區,吸引大家入場。
主辦方話,博覽會係想畀大家可以向參展嘅旅行社、航空公司、主題樂園、酒店、餐廳、觀光局及旅遊體驗平台等單位直接購買旅遊產品,亦希望公眾可以一次過了解、比對唔同旅遊平台嘅資訊,從中搵到最合適及性價比最高嘅旅遊計劃。