【Emily】女球手拍「溫情片」撐高球場 「多珍貴動植物,有友善嘅村民」
【明報專訊】粉嶺高球場收地建屋爭議鬧得熱哄哄,近日城規會舉行嘅3場公聽會,就不斷有同高球會有關嘅政商名人發言,以體育發展、環保、歷史等理由反對建屋。高球會最近仲幫職業高爾夫球手陳芷澄Tiffany拍咗條片,Tiffany喺片中表達咗反對破壞高球場嘅意見。
Tiffany噚日喺IG上載咗條兩分幾鐘嘅片,仲喺留言話自己強烈反對(strongly oppose)破壞高球場。喺片入面,Tiffany話自己7歲已經嚟粉嶺高球場睇波,2016年更喺呢度贏咗女子公開賽,取得奧運資格。佢形容粉嶺高球場「有種好特別嘅氣氛」,有好多珍貴動植物,亦有友善嘅村民,任何人都可以過嚟做運動同感受大自然。喺片尾,仲有個細路女拖住Tiffany問:「點解咁靚嘅地方要拆咗佢呀?」
「任何人可嚟做運動感受大自然」
前土地供應專責小組成員王坤同Emily講,高球會係「全軍總動員」反對計劃,但高球場有170公頃,𠵱家政府不過收番32公頃,當中亦只有9公頃係用嚟起屋,「只係攞佢一細忽,唔會影響運動發展同國際盛事」。對於球會話收地會令國際賽事重新審視賽事選址,佢形容咁樣「有啲似恐嚇」,話收地權唔喺球會或市民度,而係由政府決定。