【Emily】新巴城巴合併換新裝 兩新塗裝7．1決勝

【Emily】新巴城巴合併換新裝兩新塗裝7．1決勝

[2023.06.21] 發表

【明報專訊】城巴及新巴會喺7月1日合併，原有嘅新巴路線會併入由城巴經營，除咗司機要換制服，巴士車隊都要換新「衫」。城巴早前推出5款新塗裝設計畀公眾投選，首輪結果噚日揭盅，其中Emily最鍾意、兩款以城巴經典黃色為主調嘅5號同4號(圖1及2)設計，就以首名同次名出線，得票率分別係35.7%及23.9%。

城巴話，噚日開始舉行為期一個禮拜嘅員工投票活動，由同事喺嗰兩款設計之中做最終選擇，為車隊決定未來新裝，投票結果會喺合併當日對外公布，到時亦會為700部新巴更換新裝。

另外，新巴城巴早輪亦公布咗新logo，標誌保留咗城巴嘅黃色主色調，配以紅色箭嘴配上城巴字句，寓意時刻向前嘅精神。

若果大家鍾意嘅心水設計無當選都唔使唔開心，因為城巴提到，喺專營權合併前，5款候選巴士塗裝都會繼續行走新巴城巴路線，同市民見面，大家到時見到就可以打卡啦！