【Emily】工聯會陳穎欣造勢 何君堯又撐場 日前撐選同區陳恒鑌

工聯會陳穎欣（前排左一）報名參選新界西南地區直選，噚日搞造勢會，除咗該會前輩撐場，兩名選委高志森（前排左二）及何君堯（前排右三）都有出席。（楊柏賢攝）

【明報專訊】參選立法會新界西南地區直選嘅工聯會陳穎欣，噚日報名前搞咗個造勢大會，工聯會副會長麥美娟、立法會前議員王國興當然有到場支持後輩，但唔屬於工聯會嘅立法會議員何君堯同導演高志森兩個選委，噚日都有為陳穎欣站台，仲盛讚佢「美貌與智慧並重」。

讚陳穎欣「美貌與智慧並重」

高志森話同陳穎欣係因為拍宣傳短片而認識，好欣賞佢作為年輕人，有學識、敢言、工作態度認真，係入立法會為民發聲嘅最佳人選。何君堯就話香港好需要好似陳穎欣嘅年輕人，全力支持佢參選。

其實何君堯早幾日先出席完同樣參選新界西南、民建聯陳恒鑌嘅誓師會，兩人仲拖住手，高舉雙手造勢，仲話一定撐阿Ben(陳恒鑌)。除咗新界西南，何君堯噚日又去支持民建聯劉國勳報名參選新界北，已報名參選選委會界別嘅打鼓嶺鄉委會主席陳月明亦禮尚往來，到場撐當日陪佢報名嘅劉國勳，轉頭陳月明仲去撐參選新界北嘅元朗區議會主席沈豪傑。

以前立法會選舉，建制派之間少見互相撐場嘅場面，新選舉制度下，呢個景象都幾新鮮呢！新界北另一個報咗名嘅參選人係「香港新方向」張欣宇。選委會界別至噚日有28人報名。