【明報專訊】《老夫子》係幾代香港人嘅集體回憶，香港郵政下星期四(12月5日)會發行全港首套《老夫子》郵票和集郵品，包括一套8款兩元郵票、正式首日封、一款10元小型張、一款20元小型張、自動黏貼卷筒郵票、套摺、已蓋銷首日封和郵資已付圖片卡，大部分喺各大郵政局都有得賣。

一套8款兩蚊郵票(圖為其中4款)分別印咗《老夫子》嘅經典角色，包括老夫子、秦先生、大番薯及陳小姐，設計更加貫徹漫畫嘅「本土味」，郵票背景有青馬大橋、海洋公園、電車、黃大仙等，其中一款係老夫子、大番薯、秦先生3個老友圍住炭爐打邊爐，旁邊配一句「熱辣辣食餐飯」，睇到流口水；而8款郵票右上角都有個單字，拼埋一齊就係「行街睇戲 食飯幾味」。今次設計真係幾有心思，反轉張版票，背膠上仲印咗幾個角色嘅大頭，係香港郵政嘅第一次，真正有前有後。

如果怕多人唔想排隊，即日起至12月4日可以喺「郵購網」(www.shopthrupost.hk)預訂，明年1月22日前會收到通知領取。