【明報專訊】因反修例風波而誕生嘅《香港民主女神像》，前日(13日)凌晨由20人嘅團隊運上獅子山頂，但只係豎立咗約一日，噚日有行山者發現，香港民主女神像已經被破壞，腿部折斷，身上遭噴上紅色漆油，倒卧喺獅子山山頭。

女神像團隊：記憶無人可以破壞

香港民主女神像團隊回應話，女神被破壞係意料中事，團隊暫時無計劃復修。團隊又話，香港民主女神像喺獅子山上嘅姿態已經被全港人見證，此記憶無人可以破壞並已成事實。

約4.5米高、重80公斤嘅香港民主女神像，以示威者造型為藍本設計，戴頭盔、眼罩及「豬嘴」口罩，手持雨傘及一面寫有「光復香港 時代革命」嘅黑底白字旗幟。

漁護署就話，前日已派職員到場視察，未有發現搬雕像上去嘅人。該署噚日獲悉該雕像已倒塌，為保障郊野公園內遊人安全及維持自然景觀，漁護署正與相關部門跟進，適時安排人員清理雕像。發言人又話，根據《郊野公園及特別地區規例》，喺未經該署許可下，不得在郊野公園或特別地區內展示任何標誌、告示、海報、條幅或廣告宣傳品，違者最高可被判罰款2000元及監禁3個月。