【明報專訊】區議會選舉提名期已經開始，藝人黃夏蕙早前話考慮參選灣仔修頓區，不過似乎又出現變數。佢噚日喺facebook出post，問大家揀邊區好，形容自己有「選擇困難症」咁話。

夏蕙姨喺照片中手持區議會選舉報名表，仲油咗五星旗指甲油𠻹。有網民就叫佢去選黃大仙，因為每年都會見到佢上頭炷香咁話。

政府日前宣布引用《緊急法》訂立禁蒙面法，夏蕙姨噚日喺fb出post，問以後如果佢化厚妝，會唔會畀人罰款。佢又叫網民幫手睇吓揀邊個選區好，話黃大仙個位(現位區議員)之前係自動當選、修頓需要1463票、屯門樂翠要2013票，叫大家畀啲意見佢；而樂翠現任區議員就係立法會議員何君堯。

屯門挑戰何君曉？ 經理人話講笑

夏蕙姨嘅經理人Simon就同Emily講，夏蕙姨仲考慮緊，話出戰屯門都係開玩笑，如果決定出選，下周會開始擺街站收集提名，同埋會開記者會交代喎。