【明報專訊】區議會選舉下周五(10月4日)開始報名，各路人馬已摩拳擦掌。社民連主席吳文遠噚日喺facebook出post，透露未來9個禮拜要全面開戰、開行turbo，「光復深水埗、鏟走(民建聯)鄭泳舜」，仲話需要極大量義工幫手，結束鄭泳舜嘅區議會生涯，莫非佢有意出戰深水埗南昌北對撼鄭泳舜？
吳早前判囚無得選
吳文遠向Emily透露，佢早前被判囚4個月而未能參選，喺該區出戰嘅料係社民連另一成員鄧曉雯。25歲嘅鄧曉雯任職補習導師，上周日(15日)喺炮台山有不同政見市民衝突，當時鄧曉雯亦因非法集結被捕，被捕相喺網上瘋傳。
南昌北本來有大專政改關注組盧德昌、公民黨劉家衡積極考慮出戰，吳文遠話，社民連過去幾年喺該區都有宣傳、接個案，盧德昌本身係佢哋盟友，但佢喺反釋法遊行案中被判社會服務令，分身不暇，所以社民連就另找新人。
8月開始服務當區嘅劉家衡同Emily講，同社民連提過協調，但社民連一直未有確實人選；佢話希望雙方可以「大和解」，如果街坊認為邊個做到嘢，就邊個出選囉。
;)
