【明報專訊】繼民建聯副主席周浩鼎喺東涌嘅區議員辦事處被破壞後，該黨屯門區議員曾憲康喺屯門友愛邨愛智樓嘅辦事處前晚亦被大肆破壞。曾憲康喺facebook貼咗幾張辦事處被毁後嘅相片，形容係「滿目瘡痍」。

Emily向曾憲康了解，佢話前晚10點幾接到街坊電話，話有數以百計黑衣人喺愛智樓外叫囂，撞佢辦事處嘅大門，佢於是打電話報警；到凌晨時分返回辦事處，就見到大門破爛，入面嘅影印機、電子屏幕、電腦組合全部被毁，佢初步計算損失超過6萬蚊。

曾憲康話見到辦事處搞成咁好傷痛，「有眼淚都流唔出」，話自己都係服務居民，點解會受到咁嘅對待，「點解愛智樓有4個唔同嘅議員辦事處，得我一個被毁？」佢話香港人唔接受暴力行為，希望嗰啲破壞佢辦事處嘅人「快啲回頭，唔好錯落去」。