【明報專訊】警方星期日(11日)喺葵芳港鐵站入面發射催淚彈，唔少人批評警方喺室內放催淚彈，擔心留低化學物影響乘客，特別係老人家同小朋友，更加係影響深遠。噚日朝早就有一班好心市民，自發去咗葵芳站清潔，幫警察執手尾。

其中一位清潔者陳生就話，覺得做一件事唔係為咗幾多人睇到，而係相信自己嘅價值觀。佢覺得，好多老人家、小朋友都會搭港鐵，想確保每日搭嘅乘客都安全。佢又話，知道港鐵有清潔嘅，但例如好多冷氣槽，空氣會不停循環流動，所以佢哋都有特別抹detail位。

陳生都有表達對警方嘅不滿，話：「一係叫警方，開記者會嗰幾位，叫佢哋家人或自己都好，用雙手抹抹啊！如果你一直都覺得咁健康，你掂下啊！真係要落區去睇囉，而唔係相信(催淚彈)生產商囉！」

喺Telegram嘅「清潔地鐵頻道」入面，公布話今次行動嘅目的，係希望拒絕警方入站進行無理行動、要求港鐵要利用工業級真空處理清潔葵芳站、「必須」由第三方機構證明站內安全，同埋譴責警方使用不恰當武力清場。