【明報專訊】警方處理示威嘅手法備受質疑，之前有份聯署要求成立獨立調查委員會嘅香港電視主席王維基，噚日再喺facebook出post，轉載咗有線新聞一段關於8月5號北角有人襲擊示威者、警方4個鐘先到場嘅新聞。佢話唔係想仇視警察，但警察作為「受薪員工」，唔應該做「逃兵」，「元朗係咁、北角又係。要香港人相信警隊中沒有『黑警』？」佢兩個鐘後再出post，希望執法人員喺重大壓力下都要秉公執法，又勸抗爭者和平理性咁喚醒每個人心中嘅良知。
稱衝鋒車被圍 警方無圖證明
警方噚日喺記者會上就話，8月5號當晚襲擊事件「好突發，事前無收到情報」。港島總區高級警司(行動)吳樂俊話警方一知有打鬥，已經盡快派人去，但渣華道有好多人堵路，有前往現場嘅衝鋒車畀幾百人圍，不過，有記者話翻查片段同問過街坊，都無人見過呢個畫面，要求警方提供圖片證明屬實。
;)
