【明報專訊】民陣6月9日同16日先後舉行兩次反修例遊行，大會分別話有103萬及200萬人參與，不過部分社運人士，好似佔中9人案被判囚被告，同埋香港眾志秘書長黃之鋒因身在監獄，只能透過電視報紙關心遊行。

話要贏得比03年更徹底

其中黃之鋒早前出獄，噚日可以現身遊行人群中，Emily喺銅鑼灣怡和街見到佢嗌咪，佢鼓勵遊行嘅市民，話希望今次比2003年贏得更徹底嘅勝利，要避免更多人遭受監禁嘅恐懼，唔少人拍掌支持同呼應。

上月18日刑滿出獄嘅之鋒話，遺憾去唔到兩次百萬人遊行，坐牢感覺唔好受，噚日終有幸同大家並肩作戰。佢向遊行市民話，政府一日唔撤回修例、律政司長鄭若驊唔下台，只會有更多人遭受牢獄之災；又話愈多人上街愈可製造民意壓力，令政府唔敢檢控示威者。