【明報專訊】警察前日面對反對修訂《逃犯條例》示威者，又射橡膠子彈又射布袋彈，有唔少示威青年受傷甚至入院。天主教香港教區輔理主教夏志誠前日喺灣仔主持特別彌撒，佢話從堅道教區中心步行到灣仔聖母聖衣堂時，個心一直流淚，又同咗幾十個留喺金鐘嘅青年傾偈，覺得佢哋理性、和平、克制，「或者你會話佢哋天真，以為人多就會起作用可以推遲逃犯條例」，佢好難過青年被暴力對待，「我從無想像到香港社會點解會走到今日」。

夏志誠愈講愈激動，一邊流淚一邊講：「我哋想自由生活落去，想生命受保障，希望擁有人應該有嘅自由，唔使生活喺恐懼中，唔通咁樣好過分？唔通咁我哋唔配擁有嘅咩？唔係！」佢話用遊行、汗水表達意見，好似無用；罷課、罷工、包圍立法會，又被驅趕；青年喺街度叫口號表達意見，「有咩過分呢？點解唔可以呢？」佢都唔知仲可以做咩、仲可以點行落去。之後，佢話為咗社會要彼此相愛、彼此尊重，即使係一篇經文、一個祈禱或者一個信息，能夠做幾多就幾多。

另一邊廂，基督教嘅宗教領袖打算約見特首林鄭月娥表達意見。