【明報專訊】修訂《逃犯條例》鬧得熱哄哄，搶埋立法會審議《財政預算案》嘅風頭，議員發言時都忍唔住要抽水。話說預算案噚日進入二讀、全體委員會階段，財政司長陳茂波形容未來外圍環境不明朗，講一大輪經濟前景分析，但會計界梁繼昌就話，呢樣都唔能夠同逃犯條例嘅不明朗因素類比，話如果來年國際形勢不明，加埋逃犯條例令投資者驚惶失措，經濟增長分分鐘出現負數。但同時梁繼昌都有話今年預算案好過舊年，起碼冇再派4000蚊。 唔少議員噚日發言時，都順勢為一直未獲增撥資源嘅香港電台抱不平。法律界郭榮鏗話，每次去港台做節目，都會覺得自己好似時光倒流番去1970年代咁，形容器材相當舊。 議員為港台「缺水」抱不平 人民力量陳志全就批評，政府削減港台電台、電視部開支，較上一年度減少2%，形容做法荒謬，因為港台31電視頻道係24小時運作，仲有教育電視、新媒體等部門，批評特首林鄭月娥笑港台節目冇人聽，但事實就係「巧婦難為無米炊」。唔知司長聽到一眾議員嘅意見，又會唔會有所修訂呢？
|
| |
| |
;)
