【明報專訊】民主黨下周日(12月2日)改選領導層，選出新一屆中央委員會同紀律委員會，報名期噚日截止。前年「裸退」領導層嘅前主席劉慧卿，今次決定重出江湖參選紀委，由9人競逐7個紀委席位，參選紀委嘅仲有陳樹英、麥海華等資深黨員。紀委會未來工作包括繼續處理許智峯搶手機事件，曾表明許智峯應該退黨嘅卿姐，噚日未有評論事件，不過佢話今次係獲黨友游說參選，「執?啲紀律」，令黨內同公眾信服。
卿姐未有評估自己勝算，強調「最緊要幫個黨，黨紀係最重要」，形容處理投訴要公正公道，調查就要不偏不倚；至於當選紀委後會唔會選埋紀委會主席，卿姐就話到時先算。
多名元老退下 不選中委
中委會30個席位方面，胡志偉會競逐連任主席，未來兩年相繼有區議會同立法會換屆選舉，作為主席嘅志偉可謂任重道遠。至於兩個副主席就由羅健熙同尹兆堅參選，由於未有競爭，所以到時只需投信任票。
中委會參選名單可見民主黨內唔少元老都退下火線，包括張文光、何俊仁同楊森，仍然留低嘅有李永達同單仲偕等，至於新面孔就有社區主任梁翊婷同蘇逸恒等。
;)
