【明報專訊】團結香港基金成立4周年晚會噚晚喺會展舉行，基金主席董建華致辭時，除咗以顯著篇幅總結國家改革開放40年，亦不忘推銷填海興建人工島。董先生話人工島唔會變成大白象工程，仲話可以擔保，人工島唔會用盡香港儲備，相反係長線投資，市民更易上車置業，所以佢認為填海唔止係香港大事，更加係刻不容緩、要馬上做嘅大事。

董建華致辭時話，喺中國改革開放嘅大事業中，香港作出咗重大貢獻，早前習近平主席接見港澳代表團嘅時候話，未來中國發展，港澳依然可以有新優勢；但董先生話香港土地不足阻礙香港發展，認為填海建人工島不但關係到香港未來發展，亦關係到香港能否保持國際競爭力。