【明報專訊】曾提出年輕人是否願意「睇少啲戲、去少啲日本」儲錢買樓言論嘅青年發展委員會副主席、華人置業主席劉鳴煒，可以話係含住金鎖匙出世，究竟有錢到咩地步？劉鳴煒接受港台節目《講錢．講呢啲》訪問時透露，自己10歲生日時，父母畀咗100張金牛、即係10萬蚊現金，放入公文袋送畀佢，佢之後半年一蚊都無使過，只係日日或隔日喺屋企數銀紙，之後就同阿媽開聯名戶口將10萬蚊放入銀行。佢形容家庭教育令佢學識「應使則使，應慳則慳」，又話唔識投資，但至少知道唔應該亂使錢。

千禧年科網泡沫輸得最慘

主持問到，當一個人錢多到使唔晒，理財目的何在？劉鳴煒話理財可以係個人紀律嘅延伸，無人希望身家「少咗幾個零」，「當你有細路仔、有屋企人、有想照顧嘅人，自然會想慢慢增值」。佢透露輸得最慘嘅一次係2000年時無及時脫離科網泡沫，主要係美股為主，雖然無變「牆紙」，但事後都有諗點解察覺唔到；又形容自己唔鍾意炒炒賣賣，投資計劃短則3年，長嘅可達7年、10年。對於當年儲錢論惹爭議，劉鳴煒強調當時係想說明要儲錢嘅話，有啲消費就要犧牲，佢一直堅信，買樓、創業和讀書等統統都要儲錢，「你可以選擇唔做，就可以唔儲錢」，即使買唔到樓，人都有其他需要，「現實係，你今日儲錢買唔到樓，係咪就無儲錢需要呢？」