【明報專訊】立法會主席梁君彥主持會議嘅手法不時畀泛民批評，噚日佢接受民主黨前主席劉慧卿主持嘅網台節目《議會內外》訪問時就話，議會爭議源於議題，如果議題未處理好就交上大會，佢只能夠硬處理；佢形容過去一個立法會年度，除咗處理修改議事規則，同埋高鐵一地兩檢法案時關係劍拔弩張，其他時間都比較和諧，大家都可以暢所欲言。

梁君彥舊事重提，話當年高鐵項目向立法會申請撥款，劉慧卿就係時任財委會主席，「我做𡃁坐喺度睇住你，你班兄弟姊妹幾勞嘈呀」，強調做主席都係難。卿姐就話當年局長曾經同佢講，議員要問就開40個會，佢反問局長﹕「你發癲呀？開40個會？」最終秘書處向議員詢問，計算要開20小時會議，最終佢等大家問晒問題、發晒言之後就停止，大家亦同意。梁君彥就形容「劃線」停止發問，就係由卿姐開始，佢強調喺審議一地兩檢法案時，劃線36小時辯論時間，已經睇晒之前法案嘅做法等，作為主席亦要平衡議會云云。

對於有人批評立法會秘書處已經不再中立，梁君彥強調，立法會秘書處係唔會偏幫主席，強調每個議員有問題，都可以問秘書處，如果有議員話秘書處偏幫任何人，「唔該攞出證據」，強調議員針鋒相對，都唔應該拉秘書處落水。