【明報專訊】立法會九龍西嘅議員不時關注地區鼠患問題，除咗經民聯梁美芬，民建聯蔣麗芸(Ann姐)亦不遺餘力，佢噚日喺facebook上載訪問食衛局政治助理鄭守崗嘅短片，講完對方成長同從政經歷後，Ann姐喺短片尾聲先入正題提出訴求，話有樣嘢佢同市民都好關心，就係街頭老鼠「愈嚟愈多、愈嚟愈大隻、愈嚟愈猖狂」，仲投訴埋公廁衛生差。鄭守崗回應話會聽大家意見，睇吓點樣做得好啲。

鄭：無得落街踢波

訪問開始時鄭守崗攞住一隻公仔表演腹語，同觀眾打招呼，佢透露自己係獨子，自細受媽咪嚴密管教，無得落街踢波，亦少同街坊一齊活動，所以匿埋喺房做完功課後，就會同公仔自問自答，於是學識咗腹語。佢笑言自己嘅腹語技術未去到表演級，但都係一個唔錯嘅解悶途徑。

蔣麗芸訪問 趁機投訴鼠患

走進「熱廚房」前任職醫管局嘅鄭守崗，亦分享做政助一年以嚟嘅體會，話深深體會到改善政策可以幫到好多市民，所以大家都要多啲溝通。Ann姐即時抓緊溝通機會，提出鼠患問題，形容街頭老鼠「直頭聯群結隊喺街上行來行去」，鄭守崗就強調食環署有努力做清潔，大家如果有問題，亦可以向局方反映，局方會睇吓點樣改善。