【明報專訊】立法會一地兩檢條例草案委員會噚日完成審議，會議期間多次出現混亂場面，而喺表決緊泛民提出嗰30條修正案時，一邊廂泛民企晒起身舉牌示威，大嗌「割地兩檢違憲」，另一邊廂建制派何君堯就喺會議室內舉起手機做facebook live直擊會議情况，影住泛民示威，話泛民喺度擾亂秩序係「飯桶」。

影泛民示威 葉劉叫停

民主派議員之後發現何君堯嘅舉動，向主席葉劉淑儀投訴何違反《議事規則》，何君堯仲加埋閃光燈拍攝，舉埋隻手做鬼臉。人民力量陳志全於是走去何君堯度，指摘佢違反議事規則，嘗試用手遮住何君堯部手機。葉太命令何君堯停止攝錄，何君堯個live先停咗、收起手機，但就喺位度話泛民係「白癡」。

何君堯平時都鍾意做fb live同自拍，前年試過喺fb上載一張喺高等法院內影嘅相，被指知法犯法，最後經警方調查後，佢冇被檢控。