【明報專訊】立法會教育事務委員會噚日開會討論校園性騷擾同性教育，建制同民主派議員都認為教育局推動性教育嘅工作需要改善。民建聯立法會議員劉國勳(圖)就擔心，學校嘅教師未必識教，「可能有啲老師未拍過拖，無經驗，咁佢又點去教呢？」佢又話學生唔係接觸唔到資訊，係接觸得太多，梳理唔到正確資訊，佢建議教育局搵專家製作啲生活化嘅教材，甚至應去搵「懂得教嘅團體」入學校教授性知識，減輕教師壓力。

民建聯主席李慧琼亦認同黨友觀點，佢認為有指引唔代表教師識教，仲話自己細嗰有睇教育電視，提議製作YouTube網上影片同教育電視，由幼稚園至中學製作唔同系列嘅影片，「最好就將啲個案好似《警訊》咁，將社會發生嘅事話畀小朋友聽」。

人民力量陳志全就批評，1997年制定嘅性教育指引，將「變性」同偷窺、易服癖、露體一齊列作異常性行為，質疑標籤變性做唔好嘅嘢，建議收番指引。教育局副局長蔡若蓮回應話，因為份指引「歷史上係一份文件嚟」，已經存在，所以唔會刪除，又話2000年起已經將性教育融入常識科等學科同學校活動。